ወያኔ በአፋር ህዝብ ላይ እያደረሰ ላለው አፈናና ሰቆቃ ዋጋ ይከፍላል ሲል የአፋር ህዝብ ፓርቲ መግለጫ አወጣ

ወያኔ በአፋር ክልል እየፈጸመ ያለው አፈናና ሰቆቃ እየተባባሰ መሆኑን በመግለጽ ከትናንትና ወዲያ ማክሰኞ መግለጫ ያወጣው የአፋር ህዝብ ፓርቲ፤ አባቃላ እየተባለ በሚጠራው የማጎሪያ ካምፕ ውስጥ በርካታ የተቃዋሚ ፓርቲ መሪዎች ዘመዶች እና አገዛዙን የሚቃሙ አፋሮች በብዛት እየታጎሩ ነው ብሎአል።

ከ300 በላይ የሚሆኑት አፋሮች ላለፉት 2 አመታት ፍትህ አጥተው በእስር ላይ እንደሚገኙ ያተተው የፓርቲው መግለጫ፤ ዞን አንድ፣ ዞን ሁለትና ዞን ሶስት እየተባለ በሚጠራው አካባቢዎች አርብቶ አደሮችን እያፈናቀሉ መሬቱን ለአገዛዙ ሸሪኮች በኢነቨስትመንት ስም እየሰጡ መሆኑን ጠቅሶ፣ ይህን ፖሊሲ የተቃወሙት ሁሉ ከስራቸው እየተባረሩና እየታሰሩ መሆናቸውን አጋልጦአል።

የአዋሽ ወንዝን ለተንዳሆ የሸንኮራ እርሻ ተክል በሚል አቅጣጫው እንዲቀየር በመደረጉ፣ የዳትባካሪ የሚገኙ ገበሬዎች በውሀ እጥረት ምክንያት የእርሻ መሬታቸውን እንዲተው ተገዷል ያለው የአፋር ህዝብ ፓርቲ መግለጫ ፤ ናማሊፋን በሚባለው አካባቢ የሚገኙ የዶኮ ገበሬዎች  የእርሻ መሬታቸውን ለቀሰም የሸንኮራ ተክል አስረክበዋል፤ አብዛኞቹ የአፋር ገበሬዎችም ከአካባቢያቸው ተፈናቅለው በችግር ላይ ይገኛሉ ብሎአል።

መግለጫው በመቀጠልም የገዢው ፓርቲ ካድሬዎች ባቃዱ በተባለው አካባቢ የተለያዩ ጎሳዎችን እርስ በርስ የማጋጨት ተንኮል እየሰራ መሆኑንና በአፋርና ኢሳ ህዝቦች መካከልም ሆን ተብሎ ግጭቶች እየተቀሰቀሱ ለበርካታ ንጹሃን ህይወት ህልፈት ምክንያት እየሆኑ ነው ሲል አትቷል።

የአፋር ክልል ፕሬዚዳንት የሆነው ኢስማኤል አሊሴሮ፣ እንዲሁም የክልሉ ባለስልጣናት የሆኑት ሙሀመድ ከድር እና ስዩም አዋል የክልሉን መሬት  ያለህዝብ ፈቃድ ለሶማሊያ ክልል አሳልፈው ለመስጠት ከወያኔ አለቆቻቸው ጋር እየዶለቱ መሆኑን የገጸው መግለጫ፤ ይህ እርምጃ ዋጋው የከፋ መስዋ ዕትነት ስለሚያስከፍል  እንቅስቃሴው በአስቸኳይ ይቁም ብላኦል።

የፓርቲው መግለጫው አያይዞም ወያኔ የአፋርን ባህላዊ አስተዳደር ለማንቋሸሽ ያለውን ፍላጎት በቅርቡ የአውሳ ሱልጣን በሚነግሱበት ጊዜ አሳይቷል ካለ በሁዋላ፣  የአናሳው መንግስት በክልሉ እየፈጸመ ላለው እኩይ ድርጊት ዋጋ ይከፍላል ሲል አስጠንቅቋል።

በመጨረሻም መላው የአፋር ህዝብ ለፍትህና ለዲሞክራስ  እየተደረገ ያለውን ትግል እንዲቀላቀሉ ጥሪውን አቅርቦአል።